娱乐新闻｜袁咏仪强势回归拍《模仿人生》，靓靓被钟澍佳打动出山拍剧｜袁咏仪｜罗子溢｜陈自瑶｜模仿人生

金像影后袁咏仪相隔16年重返TVB拍摄新剧《模仿人生》，呢次亦系靓靓继2009年《富贵门》后再回巢拍剧。日前靓靓同罗子溢、陈自瑶（Yoyo）、陈桢怡、黎燕珊、吴瑞庭一齐喺深圳开工，电视广播有限公司行政主席许涛亦专程探班为剧组打气。 靓靓隔咗咁多年愿意再强势回归拍剧，一切都系因为监制系钟澍佳！靓靓大赞佳导近年作品出色优秀，亦透露之前佳导有拎作品同自己联络过，而自己表示有另一种类型想拍，之后又遇到真系钟意嘅剧本，所以就肯出山拍剧！再加上靓靓老公张智霖（Chilam）都好支持老婆工作，皆因Chilam相信「人唔做嘢系会好快死」，不过讲到Chilam会唔会探班，靓靓就话Chilam好少做呢啲嘢！ 靓靓虽然有段时间冇拍剧，不过佢都有追睇电视剧，仲话好钟意《婚后事》添！靓靓更笑言自己签约时特别要求剧组，要令《婚后事》男、女主角子溢同Yoyo一齐拍呢套剧。讲到同两位合作感觉，靓靓都觉得好新鲜，不过知道两位同自己都系处女座时，佢都吓咗一跳：「咁麻烦？咁点解呢套剧唔喺八、九月拍？咁我地可以做个大生日。」 可以同靓靓呢位影后级前辈合作，都令子溢同Yoyo觉得好期待，Yoyo更希望可以同靓靓有多啲对手戏。至于子溢就认为一切都系缘份，因为之前自己同Chilam合作，而家又有机会同靓靓合作，令佢兴奋得嚟又战战兢兢，好似追女仔咁啊！