娱乐新闻｜甄子丹颁发最佳剧集，台上为众人谋福利｜万千星辉颁奖典礼2024｜甄子丹｜李子雄｜张耀扬｜邵美琪｜温兆伦｜向海岚｜陈妙瑛｜罗嘉良｜黎耀祥｜曾志伟

《万千星辉颁奖典礼2024》圆满落幕，除咗得奖名单有惊喜外，今年嘅颁奖嘉宾更加令大家喜出望外，宇宙最强 甄子丹 颁发最佳剧集，佢仲带埋正日生日嘅囡囡 甄济如Jasmine 以及太太 汪诗诗 同行。 丹爷除咗恭喜得奖者外，仲喺台上为大家谋福利叫加人工，事后佢就话同咁多位老板都认识，所以先帮口讲两句，佢笑言相信一定会加人工嘅。至于讲到点同刚满21岁嘅Jasmine庆祝？丹爷就话做完颁发嘉宾后就会即刻去会合太太同囡囡。 张耀扬同李子雄同台颁奖，即刻令大家勾起佢哋饰演嘅反派角色，唔讲唔知原来佢哋自己都会不时重温自己嘅作品，李子雄仲话有时搭飞机见到附近乘客睇佢有份演出嘅《英雄本色》时，都会偷偷影低。张耀扬就话而家睇返自己演「乌鸦」呢个角色时都会笑，因为佢觉得个角色好得意，又指编剧同导演都好落力为佢哋造就一个角色。 邵美琪同温兆伦呢对《我本善良》CP合体颁奖，相信都勾起唔少人回忆，邵美琪指虽然佢同温兆伦唔系成日见面，不过因为自己成日都会重温《我本善良》，所以感觉就好似成日见咁。而温兆伦就表示可以藉今次颁奖呢个机会，畀佢哋都多谢一下TVB，因为TVB真系制作咗无数经典剧集。 勾起回忆杀嘅仲有呢对《无头东宫》嘅好姐妹，好耐冇见嘅陈妙瑛状态大勇，大家都好期待佢哋嘅幕前演出，向海岚就指睇到网民话每次见到佢同陈妙瑛「合体」都会好开心，而佢亦好开心大家相隔咁多年都仲记得同钟意佢哋；而陈妙瑛就话相当感恩，自己已经咁耐冇喺幕前演出，但大家都仲咁钟意佢。至于问到有冇机会见到佢哋再次合体于幕前演出？陈妙瑛就话世事无绝对，佢又指之前都有监制问过，但当时因为自己嘅生意太忙而未有答应，向海岚则指佢哋每次聚会时都会有倾呢个话题，如果时机啱嘅都唔排除有可能呀。 两位三届视帝纪录保持人罗嘉良同黎耀祥则一齐揭晓今届视帝，虽然祥仔都系今届视帝候选人之一，但佢就话喺台上并唔紧张，仲话有嘉良呢位老朋友喺身边就已经够放松，佢又指因为当年大家合作咗好多套剧集，当时大家食饭瞓觉都几乎一齐，所以相信熟稔。 另外仲有任达华、方中信、许绍雄、温碧霞、林嘉华、韩毓霞等为颁奖典礼担任颁奖嘉宾，能够有呢个豪华颁奖阵容，全靠曾志伟碌爆人情卡。志伟指事前向好多同事做过调查，问大家想见到咩嘉宾，同时又希望每组嘉宾都会同个奖项有少少关系，而当佢亲自打电话邀讲大家时，大家都好畀面，加上好多位都系喺TVB大，所以好多人都好怀念返嚟TVB呀!