富贵千团｜傅嘉莉超贴身造型大晒完美葫芦身形 360度零赘肉加结实背肌超吸睛

《富贵千团》除了两大诈骗集团OPM及Smart Cap的斗智斗力、斗心计斗财技够晒吸引，两大女主角汤洛雯及傅嘉莉的造型及拼搏演出亦为剧集一再增添亮点。先说在上月《万千星辉颁奖典礼》中勇夺最佳女配角殊荣的傅嘉莉（Kelly饰），Kelly在剧中饰演擅于操控人心（PUA）的Smart Cap中坚份子Irene，不但口才一流，身形与颜值同样一绝。单以Kelly的出场战衣来说，超贴身的剪裁将其美好身形展露无遗，堪称360度零赘肉、零死角；至于另一套低胸波点公主袖战衣，单从正面看已够晒女人味，加上背部的修身剪裁及大露背绑带设计，再次突显Kelly超完美线条；而观乎Kelly的数款露背装，其背肌线条操得相当完美，尤其中间清晰结实的坑位，更是要付出不少努力才能操到的效果。

Kelly笑言呢场戏，收咪好难收，成日穿崩。

Kelly接受TVB.COM访问时，笑言近日剧集出街后，监制亦忍不住大赞她拍摄期间身形甚弗：「监制最近都message我讲咗三次，『你嗰阵真系好弗呀』，我都有因为咁即刻回顾番（套剧）。其实谂番起个拍摄真系心惊胆跳，其实出场嗰条裙，最大挑战除咗系keep弗，仲有系收咪，因为支咪真系唔知点摆好。因为我哋用无线咪，即系主机能一条线有个咪头咁，个主机真系好难收。而我出场嗰条裙，无论个主机摆喺边都系会穿崩嘅，前后左右都唔得之余，摆喺大髀中间又条裙太短喎，嗰时真系谂尽办法。最后我要每拍完一个镜头，就要换一换个主机嘅位置，即系拍我back shot，我就摆番个主机喺前面，仲要每一次都要入厕所整，好攰呀！」

Kelly续指由于试造型时已知道所有衣服都相当虾人着，故此拍摄前不无压力，还因而开启了做运动及节食keep弗模式：「本身个造型系需要（着到咁）嘅，因为我系Smart cap入面唯一嘅女性，同埋要系吸睛啲嘅，变相啲造型要诱人啲。以前做model时我都有baby fat，嗰时已经有套keep弗方法入咗血。第一系梗系要控制饮食啦，尽量多菜多肉少碳水，但唔食又唔得，通常我会摆饭做第一餐，其余时间真系食得好清淡，主要系菜呀鱼肉呀少少海鲜同鸡蛋。我本身系可以食得好清淡嘅，麦皮我可以食水煮，烚菜同清蒸海鲜我都好钟意嘅，我反而唔系好钟意食有汁嘅嘢。因为呢个饮食已经习以为常，所以冇觉得好辛苦。」做运动方面，Kelly则最爱跑街：「我觉得最快减肥方法系有氧运动，最舒服系跑街，但要body靓系真系要游水嘅，依家都有做吓家居运动。同埋我都会焗桑拿同浸脚，keep住个血液循环快啲个效果亦会显现啲。」