娱乐新闻｜周润发启发王宝强爱上跑步，自爆送表收对方为首徒｜周润发｜王宝强｜刘昊然

周润发孖新戏拍档香港出席首映 点名睇好老友梁舜燕孙仔阮浩棕 由周润发、王宝强，刘昊然等参演嘅电影《唐探1900》，喺内地大收旺场突破28亿人民币。呢日电影团队喺香港举行首映礼，预祝票房大卖，电影公司老板林建岳、发嫂、黄百鸣等都有出席。 喺戏中饰演唐人街大佬嘅发哥，首次同宝强合作，两人一拍即合，就连发哥对跑步嘅热情，都感染埋对方。发哥大赞宝强系乖学生，就算佢返咗香港，宝强都会自动自发去跑步，发哥仲搞笑话自己送咗只可以测心率嘅表俾宝强，咁就可以日日监控佢有冇认真跑步。 发哥一向亲民无架子，经常同演员们打成一片，不过喺片场，佢就有一定嘅威严，仲讲明唔希望演员等埋位时，成日电话不离手，新生代演员刘昊然就坦言自己平时机不离手，不过经过发哥指教，依家开始学习放低手机，就算等戏都可以观摩其他演员嘅演出。 发哥呢次喺戏中仲有一大挑战，就系有一段长达三分钟嘅全英语对白，发哥话自己就算喺荷李活拍过好多部戏，但都未试过有咁长嘅对白，所以难度好高，需要日夜练习，自己亦有同导演讨论将对白改到尽量口语化。 今次发哥继电影《谍海风云》后，再有机会同John Cusack合作，佢话有种久别重逢嘅开心。至于问到佢睇好边位香港演员，发哥就点名阮浩棕，佢仲话好理解电视台演员多，好难先可以等到机会，相信阮浩棕听到发哥嘅鼓励一定会大受鼓舞呀！