东张西望｜畲诗曼、杨茜尧、林保怡罕有同框！「77工作室春茗暨庆功宴」阵容星光熠熠｜畲诗曼｜杨茜尧｜林保怡｜陈展鹏｜谭俊彦｜陈山聪｜张振朗

TVB 77工作室举行春茗暨庆功宴众星云集，曾志伟、钟镇涛、林保怡、畲诗曼、杨茜尧、高海宁、刘佩玥Moon、陈展鹏、陈山聪、张振朗、何广沛、陈晓华Hera 、邓智坚、林景程、高钧贤、王敏奕、黎燕珊、袁伟豪同太太张宝儿、蒋祖曼，罗毓仪、郭柏妍Rosita、朱晨丽、许绍雄、张颕康同太太麦雅致、丁子朗、吴业坤、傅嘉莉Kelly、蔡洁、吴若希Jinny、张驰豪Aska 及77工作室总裁钟澍佳等，场面似足台庆一样星光熠熠。 志伟喺台上感谢一众台前幕后嘅努力令TVB获得佳绩，大家值得食餐好嘅。钟澍佳则表示会努力创作更多好作品，知道每位演员都渴求好剧本，并预告皇牌剧集《新闻女王2》将于3月开工。席间林保怡重遇两大视后畲诗曼同杨茜尧，三位都系好戏之人，合体拍剧必定有震撼张力。 山聪重提当年同Bowie合作剧集《随时候命》，因当年自己初出茅庐演技未够成熟，曾被Bowie掟剧本，好彩事件并冇吓怕山聪，反而感激前辈教导令佢扎稳根基，希望孖视帝张振朗一齐同Bowie嚟个合作。山聪大赞Bowie不用睇剧本都可以临场发挥，呢点亦系佢近十年想掌握之一。 日前台湾艺人王大陆因涉嫌逃兵役被捕，曾经同佢合作过嘅Bowie同高钧贤都希望王大陆呢场风波快啲平息，Bowie话春节时大家都有互相联络，希望对方唔会受事件影响，而高钧贤亦大赞王大陆为人友善。 钟镇涛同陈展鹏一齐参演剧集《巨塔之后》，可惜两人并冇对手戏，令佢哋有少少遗憾。啱啱过咗72岁生日嘅B哥哥近日庆祝不断，切咗近十个生日蛋糕，食到肚满肠肥。 阿Moon同陈炜同样有份参演《巨塔之后》，两人重聚鸡啄唔断，阿Moon更好羡慕炜哥今年情人节有花收好Sweet。高海宁新年期间喺美国做骚后顺便同苏民峰师傅见面，获师傅师母带佢又玩又食，过咗个好开心嘅新年。 临盆在即嘅何依婷趁仲系活动自如，就出嚟见吓朋友欢聚，透露家中嘅BB房已安排得七七八八，英文名亦都谂好，但中文名就令两公婆好头痛，仲未落实。