戀上西沙｜李爾晨為新劇晒超強胸肌引發迴響 前香港男子甲一排球員 4年前踩入商界現擁7間品牌健身室

李爾晨（Kyle）在音樂特輯《戀上西沙》中的表現相當搶焦，在圈中是馳名大隻仔的他，在特輯不時大晒超強胸肌及朱古力腹肌，無論線條或是弧度均相當吸睛，當中尤以羅馬戰士裝束最特別。

為了操出這身靚肌，Kyle之前花了極多功夫日操夜操，再配合節食及「甩水」，才有如此完美效果，Kyle說：「我永遠都擔心自己啲肌肉狀態係唔夠，所以知道要除衫後事前有加緊操練，同埋戒咗夜晚嗰餐。為咗個線條出啲，我都加強咗胸肌同腹肌嘅訓練，瞇埋眼就係咁操，同埋做埋甩水嘅部分。之前做運動員就唔使甩水，但退咗役就要。」

予人感覺是運動達人的Kyle，在特輯中是直立板、高爾夫球及棍網球專家，不過Kyle笑言其實他自己也是首項接觸相關三項運動，故此扮專家對他來說也是頗大挑戰。熱愛增值的Kyle，又指近期愛上打網球，更與鄧智堅、孔德賢、黃子恆、黃庭鋒等等是波友。

談到近況，四年半前開始投資健身室的Kyle，晃眼間已計劃開第7間健身室（包括下年五月前落成的深圳及啟德分店），年尾更會開設首間美容院，甚有生意頭腦。雖然看似風光，但Kyle坦言這條生意路走來不易：「做生意由零開始，慢慢遇上唔同嘅人同機會。四年半前開第一間時，當時Opening好多圈中人同樂小姐都有到場祝賀。當時大概係疫情前半年左右，之後撞正疫情個經濟就一直都唔係幾好。」Kyle續指由於他與Partner開設的是女士專屬健身室，加上教練團隊條件優秀，更有前港隊成員坐陣，故開幕後反應及生意不俗，品牌於女士運動界亦頗有名氣。「所以今年我一次過開咗兩間分店，喺灣仔同荔枝角，都係我同Partner幾大膽嘅決定，因為個市唔係太好，但亦因為咁，好多舖頭做唔住，好多人退出呢行，所以我哋選擇喺呢個時候去擴充。嚟緊我哋會喺深圳同啟德再有新舖。」

由於要同時兼顧生意及藝人工作，Kyle坦言心理壓力好大，除了因為多嘢兼顧，亦因為他驚覺運動員的一套完全不能應用於生意及演藝路上：「做生意永遠冇盡頭，即係做得差時你會想點樣做好，做得好似好好時，又想做得更加好，係無止境嘅追求，真係要用好多時間適應。以前做運動員，你打個波落地下攞一分，標準嚟架嘛，但做生意做演員唔係喎，咩叫好呀？唔知架喎，唔係用力就可以，所以真係要用好多時間調整同適應，亦因為咁呢幾年成長咗好多。」