異空感應｜陳少邦再演奸角染白全頭求新鮮感 從演25年含淚殺氣眼神獲讚好戲：話晒咁多年

《異空感應》除大膽起用年青演員擔正做男、女主角，劇集更善用了無綫演技實力出色的綠葉演員。首星期的單元，監製王心慰（Amy姐）一口氣晒冷了三大好戲綠葉，分別是魯振順（阿旦）、第一代及新一代「奸人專業戶」鄭子誠與陳少邦，當中兩代奸人子誠與少邦更有不少精彩對壘場面。昨晚（29日）劇情主要圍繞陳少邦飾演的Tyson，Tyson對上司范爺（鄭子誠飾）忠心耿耿、視范爺為偶像，為了范爺連殺人亦在所不惜；但原來范爺一直只視Tyson為棋子兼傻仔，最終Tyson在方日進（陳家樂飾）及可嵐（陳曉華飾）夾計挑撥下，除爆出自己是殺死方以信（魯振順飾）真兇，還爆出范爺所有罪行，最終二人齊齊被繩之於法！

近年先後憑在《法言人》、《疊影狙擊》及《反黑英雄》飾演不同類型的奸角贏盡好評的陳少邦，這次再演奸人仍見突破。由於Tyson是一名脾氣暴躁、惡形惡相的老粗，少邦偏誇張的演繹與角色性格脗合；而昨晚一場講述Tyson為了脫罪、不惜「動物上身」扮精神出現問題的場口，陳少邦七情上面地扮動物吼叫兼攀爬犯人欄的舉動更是相當搶焦，有網民直指陳少邦於落口供場口既憤怒又委屈的含淚眼神相當好戲，留言讚嘆：「話晒咁多年。」原來為了演奸角得嚟令觀眾依然有新鮮感，陳少邦在造型上花了不少心思，並主動向Amy姐提出染白頭髮增加記憶點及角色的悲劇感：「因為個角色好鍾意貓，呢個位其實係佢可憐嘅地方嚟，因為係突顯佢好寂寞、身邊完全冇朋友呢個point。亦因為Tyson好鍾意貓，所以我就諗不如染到啲頭髮好似動物毛色咁。」陳少邦續指為了連戲，連續半年每兩個星期就要漂一次頭髮，以致髮質嚴重受損兼斷了很多頭髮，但他覺得值得：「因為我想每次出嚟都有啲唔同，等觀眾多啲新鮮感。」

拍埋身嗌交戲誤吞鄭子誠口水唔敢嗌Cut
除了要應付情緒場口，陳少邦還要應付大量動作場口，其中持刀與陳家樂在車內拉扯一幕，只見刀尖不斷在少邦及家樂眼前劃過，相當觸目驚心；陳少邦接受tvb.com訪問時坦言當時手持是真刀，並謂：「把刀未開封嘅，但都會受傷，所以我拍時打醒十二分精神，最緊要唔好整到家樂。」他又大讚前輩鄭子誠超正：「佢永遠都好開心、正能量好強，聽佢講嘢直情係享受！佢唔會搶人戲，永遠只會幫你同配合你，我同親佢拍對手戲，都係一take就搞掂。」少邦又笑言拍攝昨晚播出的鬧交戲時，由於二人發生衝突時距離太近，以致誤吞鄭子誠口水，但為了拍攝，陳少邦都選擇當沒事發生一樣繼續演下去。