奔跑吧！勇敢的女人們｜賴慰玲超弗運動Look晒超強人魚線 上載最新增磅孕照獲封「最美麗孕媽」

懷胎十月隨時生得的賴慰玲（Winki），日前在個人社交網上載數張靚靚近照後，以hashtag「重咗35磅之後」以及「我明點解要嘟嘴影相」自嘲長肉不少，更大方上載「嘟嘴」前後對比照。

雖然阿賴咁講，但其好友及網民依然力撐她身形good，當中陳凱琳留言：「You still look beautiful」，其他網民則說：「都仲係好瘦好瘦呀」、「最美麗的孕媽」、「Still stunning（令人驚艷）」、「唔覺有肥到」。

重了35磅都依然美麗動人的阿賴，身形之所以咁好其實並非完全得天獨厚，阿賴其實有做開運動，她接受TVB.COM訪問時透露瑜伽是其中一項她持之以恆的運動，而翻查其個人社交網，阿賴偶爾有分享與好友做瑜伽的打卡照。而在新劇《奔跑吧！勇敢的女人們》中，阿賴亦有一展所長，除在劇中以KOL身份教人做運動外，更不時大晒軟骨功，昨晚一場幫蕭正楠的拉筋場口，阿賴一招「蛙式屈膝」雖然望上去很簡單，但其實難度系數相當高，筋骨冇番咁上下柔軟絕對做不到，難怪有網民忍不住讚歎：「真係唔係咁易做到。」

除柔軟度一流，阿賴拍攝《奔跑吧！》時的身形亦相當養眼，除了很多造型都將佢蛇腰展露無遺，其中一張劇中廣告造型照，更能清楚見到阿賴的迷人鎖骨及人魚線！其實為了配合劇中當紅廣告女星身份，阿賴確實下了不少功夫，並一反常態「一日一mask」保持肌膚最佳狀態：「拍呢個劇時我都真係有努力去保養吓自己，平時我係唔去保養自己嘅。但係我知呢個角色要靚，要狀態好好，所以嗰時每日都敷mask。」阿賴還不忘感謝服裝部同事：「佢哋搵咗好多好靚嘅衫畀我，幫補咗個角色好多。」

同場加映阿賴靚靚頭箍Look，好多款架都！