《中年好聲音4》吳亦偉再唱原創歌《爸爸》感動全場 海兒喊到大髀擺滿紙巾

《中年好聲音4》明（17日）晚8點翡翠台播映「人生之歌」下半場！之前憑原創歌《吳亦偉》奪MVP、被封「ACE偉」的吳亦偉，今次於「人生之歌」再以原創歌《爸爸》出戰，唱出自己對爸爸既敬愛又擔心的感覺，感動全場。

亦偉喊住表示，一直以來都覺得父親就好似巨人一樣，但直到2019年爸爸突然中風，亦偉先驚覺原來巨人都已經老了。他想送一份禮物畀爸爸，當時腦海入面諗起細個同爸爸相處的片段，於是寫下這首歌，但一直都唔敢喺爸爸面前唱，所以就藉住「人生之歌」將呢首歌送畀爸爸。

三位女評審肥媽、谷婭溦同海兒聽到亦偉對爸爸的告白後都喊到淚流滿面，海兒更喊到大髀擺滿紙巾。「冷血」的周國豐竟然取笑谷婭溦：「你啲眼妝甩晒喎，哈哈！」不過他亦坦言亦偉的歌聲好感動：「連我呢個真係好難喊嘅人，係有啲咬唇。」

至於雷小雷，原來每次比賽後都會花超過二十小時搭車返浙江探望87歲的嫲嫲。他自小父母離異，成日被同學欺負，家族入面只有嫲嫲對他不離不棄，兩嫲孫一直相依為命。小雷透露嫲嫲每日凌晨三、四點起身上山挖中藥，之後再徒步去市集換錢，一生都十分辛勞，所以希望自己將來有能力畀嫲嫲過最好的生活。

小雷感性表示，童年時以為自己「飛」唔起，但原來「翅膀」一直都喺身邊，所以選唱《隱形的翅膀》送畀嫲嫲。他全程面帶微笑，但雙眼閃住淚光，將對嫲嫲的思念同愛意化成歌聲。小雷唱畢後表示，嫲嫲係他生命中最感謝的人，更特別喺電視機前用畲（粵音：蛇）族語隔空向嫲嫲告白：「你聽到我唱歌嗎？我唱得好唔好聽……」雖然全場未必太多人聽得明，但小雷真誠的語氣依然感動全場，肥媽更喊到眼腫！海兒就大讚小雷的高音好通透，令人聽得好舒服，谷婭溦則讚他演出好穩定。

相片來源: 《中年好聲音4》

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。