虛擬情人｜結局周必睇位速報！郭柏妍驚喜客串 Adam面臨大危機？

《虛擬情人》，本周一至周五晚八點半喺翡翠台播出最後五集。來到結局周，程晴（王敏奕飾）同Adam（朱敏瀚飾）嘅「完美愛情」將面臨超大危機。首先，Neo意外得知Adam已經走入現實世界呢個驚人真相，加上Neo辛苦建立嘅公司面臨被告同埋財困等一堆危機，令一向理智嘅Neo最終崩潰「大暴走」，除咗對公司員工發難，更一度嘗試破壞Adam嘅「虛擬空間」，令Adam面臨前所未有嘅重大危機…

另一方面，一直住喺Adam心裏嘅阿Bug，亦出現不穩定情況，「飛出飛入」相當可疑，不過身體日漸虛弱嘅Adam卻未有將實情告訴程晴，仍然勉強自己使用「虛擬力量」幫助程晴…

除了Adam同程晴嘅關係出現危機，結局周中程晴與好友小雨（譚嘉儀飾）之間嘅閨密情、小雨同大明（鄧智堅飾）表面平穩嘅夫妻關係、Neo同程晴形同虛設嘅情侶關係都全線爆煲；其中一幕程晴與小雨嘅吵架場口，更突顯「平凡女人」同「女神」做閨密嘅痛苦與不甘，小雨喺場口中吐出嘅每句對白都有血有肉，令人心痛，包括：「啱嘅，我呢啲咁嘅人，我真係應該平平凡凡、簡簡單單咁過架啦，你一直都係咁諗架啦！」、「你梗係聽唔明啦，你呢啲天之驕女，有冇企喺我角度諗嘢架咩？」至於敏奕則全程一臉無奈高呼「我以為…」、「我以為…」，當中含淚委屈樣真係令人心疼，相信播出時定會引起不少女性共鳴。

結局周另一焦點，第四度同框拍劇嘅朱仔同黃子恆，二人嘅合作順序同關係為：《機場特警》同袍、《拳王》好友、《痞子無間道》夥伴、《虛擬情人》情敵，喺結局周將復刻《拳王》經典打拳場面，暴走嘅子恆更加會火力全開向朱仔窮追猛打，萬勿錯過。

另外，首周請來陳豪客串演出李文信醫生一角為劇集增色不少，結局周同樣有驚喜客串，佢就係女神級藝人郭柏妍（Rosita）。據知Rosita同監製瑋澄因合作《白色強人2》結緣，因為兩人頗為投緣，瑋澄就誠邀Rosita客串佢嘅處男監製劇，Rosita亦爽快答應。據聞，Rosita喺劇中飾演妙齡侍應，並會同鄧智堅有最多對手戲，想知屆時會唔會玩《下流上車族》crossover？緊密留意結局周嘅《虛擬情人》。

按此下載 TVBAnywhere+ APP，英國、澳洲及其他海外觀眾一APP睇哂TVB最新劇集、經典港劇、綜藝娛樂、香港新聞、娛樂消息。網頁版一樣可以線上收看。按此查看收費計劃，或者立即註冊收看免費內容。